ಸ್ತ್ರೀ ಸಂಘಟನ್ ಬೊಂದೆಲ್ ಘಟಕಾಂತ್ ಮಾನ್ಸೂನ್ ಮಿಲನ್ – 2025

ಮಾನ್ಸೂನ್ ಮಿಲನ್ 2025 ಹ್ಯಾ ನಾಂವಾಖಾಲ್, ಸ್ತ್ರೀ ಸಂಘಟನ್ ಬೊಂದೆಲ್ ಘಟಕಾಚೆಂ ಸಹಮಿಲನ್, ಜುಲಾಯ್ 19 ತಾರಿಕೆರ್, ಸಾಂ ಲೊರೆಸ್ ಫಿರ್ಗಜೆಚಾ ಹೊಲಾಂತ್ ಆಯೋಜನ್ ಕೆಲೆಂ. ಹೆಂ ಕಾರ್ಯೆಂ ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ಪಾವ್ಸಳ್ಯಾ ವಿಶೇಷ್ ಖಾಣಾಂಚೆ ಫೆಸ್ತ್ ಜಾವ್ನ್ ಆಸ್ ಲ್ಲೆಂ ತರ್, ಹ್ಯಾ ಪಾವ್ಟಿಂ, ರಾಂದ್ಪಾಂತ್ ಇಲ್ಲಿಶಿ ಬದ್ಲಾವಣ್ ಕೆಲಿ.

ಹ್ಯಾ ಕಾರ್ಯಾಕ್ ಬೊಂದೆಲ್ ಫಿರ್ಗಜೆಚೆ ವಿಗಾರ್ ಮಾI ಬಾI ಆಂಡ್ರು ಲಿಯೊ ಡಿಸೋಜ, ಮಾI ಬಾI ಪೀಟರ್ ಗೊನ್ಸಾಲ್ವಿಸ್, ಅತ್ಮಿಕ್ ನಿರ್ದೇಶಕ್, ಮಾI ಬಾI ಲೊರೆನ್ಸ್ ಕುಟಿನ್ಹಾ, ಸಹಾಯಕ್ ವಿಗಾರ್, ಶ್ರೀ ಜೋನ್ ಡಿ’ಸಿಲ್ವ, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್, ಶ್ರೀ ಸಂತೊಷ್ ಮಿಸ್ಕಿತ್, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಕಾರ್ಯದರ್ಶಿ, ಶ್ರೀ ಮನೋಜ್ ಲುವಿಸ್, ಸರ್ವ್ ಆಯೋಗಾಂಚೊ ಸಂಚಾಲಕ್, ವೆದಿಚೆರ್ ಹಾಜರ್ ಆಸ್ ಲ್ಲೆ. ಹೆಂ ಕಾರ್ಯೆಂ ಭಿಂಗಾರಿ ಫುಲವ್ನ್ ಉದ್ಘಾಟನ್ ಕೆಲೆಂ.

ಹ್ಯಾ ವೆಳಾರ್ ಗೊವ್ಳಿಕ್ ಪರಿಷದೆಚೆ ಸಾಂದೆ ಆನಿ ಸರ್ವ್ ವಾಡ್ಯಾ ಥಾವ್ನ್ ಆಯಿಲ್ಲಿಂ ಸಯ್ರಿಂ ಹಾಜರ್ ಆಸ್ ಲ್ಲಿಂ. ಅಧ್ಯಕ್ಷ್ ಶ್ರೀಮತಿ ಅವಿತಾ ಮಸ್ಕರೇನ್ಹಸ್ ಹಿಣೆಂ ಜಮ್ಲೆಲ್ಯಾ ಸರ್ವಾಂಕ್ ಸ್ವಾಗತ್ ಕೆಲೊ.

ಕಾರ್ಯೆಂ ಸಾಂಜೆಚಾ 4 ವೊರಾರ್ ಪೊಣ್ಸಾ ಆಪೊಳ್, ಪೊಣ್ಸಾ ಪಾತೊಳಿ, ಗಾರಿಯೊ ಆನಿ ಕಾಫಿಯೆ ಸವೆಂ ಆರಂಭ್ ಕೆಲೆಂ. ಆಯಿಲ್ಲ್ಯಾ ಸರ್ವಾಂನಿ ತಾಂಚಿ ನಾಂವಾ ರೆಜಿಸ್ಟರ್ ಕರ್ತಚ್, ತಾಂಕಾ 4 ಗ್ರೂಪ್ ಕರ್ನ್ ವಿಂಗಡ್ ಬಸ್ಕಾ ದಿಲಿ. ಮಾಗ್ಣ್ಯಾ ವಿಧಿ ಸಾಂದ್ಯಾನಿ ಚಲವ್ನ್ ವೆಲಿ. ಮಾI ಬಾI ಪೀಟರ್ ಗೊನ್ಸಾಲ್ವಿಸಾನ್ ವಾಂಜೆಲಾಚಾ ವಾಚ್ಪಾಚೊ ನಿಯಾಳ್ ದಿಲೊ. ಭಾವಾಡ್ತ್ಯಾಂಚಿ ಪ್ರಾರ್ಥನಾಂ ಜಾಲ್ಯಾ ಉಪ್ರಾಂತ್, ಮರಿಯೆಚೆಂ ಗೀತ್ ಗಾವ್ನ್ ಮಾಗ್ಣೆಂ ಸಂಪಯ್ಲೆಂ.

ಮಾ ಬಾ ಲೊರೆನ್ಸ್ ಕುಟಿನ್ಹಾ ಹಾಂಚೊ ಜಲ್ಮಾ ದೀಸ್ ಆಚರಣ್ ಕೆಲೊ ಆನಿ ತಾಂಚಿ ಭೊಗ್ಣಾಂ ಉಚಾರ್ಲಿಂ. ವಿಗಾರ್ ಬಾಪಾಂನಿ ತಾಂಚೊ ಸಂದೇಶ್ ದಿಲೊ ಆನಿ ಸ್ತ್ರೀ ಸಂಘಟನಾಚಾ ಸಾಂದ್ಯಾನಿ ಫಿರ್ಗಜೆಂತ್ ಉರ್ಬೆನ್ ದಿಂವ್ಚಾ ಸೆವೆಕ್ ಆನಿ ನಿರಂತರ್ ವಾವ್ರಾಕ್ ಶಾಭಾಸ್ಕಿ ದಿಲಿ.

ಡೊ. ಪ್ರೀತಿ ಕೀರ್ತಿ ಡಿಸೋಜ ಹಿಚಾ ಮುಖೆಲ್ಪಣಾರ್, ಮಾಲ್ಘಡ್ಯಾಂಕ್, ಕಾಜಾರಿ ಜೊಡ್ಯಾಂಕ್, ತರ್ನಾಟ್ಯಾಂಕ್, ಬುರ್ಗ್ಯಾಂಕ್ ಆನಿ ಪಾದ್ರ್ಯಾಬಾಂಕ್ ನಮೂನ್ಯಾವಾರ್ ಖೆಳ್ ಚಲವ್ನ್ ವೆಲೆ ಆನಿ ಸರ್ವಾನಿಂ ಖೆಳಾಂತ್ ಸಂತೊಸಾನ್ ಭಾಗ್ ಘೆತ್ಲೊ. ಹರ್ಯೆಕ್ಲ್ಯಾಂಕ್ ಉಡಾಸಾಂತ್ ದವರ್ಯೆತ್ ತಸಲೊ ಅನ್ಭೋಗ್ ಜಾಲೊ. ಜಿಕ್ಲೆಲ್ಯಾಂಕ್ ಇನಾಮಾಂ ವಾಂಟ್ಲಿ. ಕಾರ್ಯೆಂ ಅಖೇರ್ ಕರ್ಚಾ ಪಯ್ಲೆಂ ಸರ್ವ್ ಥರಾನಿ ಆಧಾರ್ ದೀವ್ನ್ ಸುಧಾರ್ಸಿಲ್ಲ್ಯಾಂಚೊ ಉಪ್ಕಾರ್ ಆಟಯ್ಲೊ. ವಿಗಾರ್ ಬಾಪಾನಿಂ ಜೆವ್ಣಾಚೆರ್ ಆಶೀರ್ವಾದ್ ಮಾಗ್ಲೊ. ಸಾಂದ್ಯಾನಿ ತಯಾರ್ ಕೆಲ್ಲೆ ಜೆವಾಣ್, ಸರ್ವಾನಿ ಸಂತೊಸಾನ್ ಸೆವ್ಲೆಂ ಆನಿ ಧಾದೊಶಿ ಜಾವ್ನ್ ಘರಾ ಚಮ್ಕಾಲಿಂ. ಹ್ಯಾ ಕಾರ್ಯಕ್ರಮಾಂತ್ ಸುಮಾರ್ 200 ಜಣಾಂನಿ ವಾಂಟೊ ಘೆತ್ಲೊ.